Говь-Алтай аймгийн Тайшир сум нь 1924 онд байгуулагдсан, хуучнаар Засагт хан аймгийн Эрдэнэ бишрэлт Засагт хааны хошуу. Хуримт, Далан, Галуут гэсэн  3 багийн  нийт  412  өрхөд 1470 хүн амьдардаг. Тайшир сум  нь  Монгол Улсын баруун хязгаарт Говь-Алтай аймгийн  зүүн  хойт хэсэгт Хасагт Жаргалангийн нуруунаас урагшлан Хан Тайширын  нурууны ар хүртэл хангай говийн  зааг Завхан голын дагуу  уул нуруу, тал хээр хосолсон 390.3 мян га талбайд оршдог. Далайн төвшинээс дээш 2750-3275 м өргөгдсөн.

Тайшир сум нь  Монгол орны баруун хязгаарт, Хасаг хайрханы өвөр бэлээс Хан Тайширын нурууны ар хормойд, Завхан голын сав дагуу хангай говь хосолсон 391.3 мянган  га газар нутагтай, урд талаараа Дэлгэр, баруун талаараа Есөнбулаг, хойд талаараа Жаргалан, зүүн талаараа Завхан аймгийн Цагаанчулуут, Шилүүстэй сумтай хиллэдэг.  Сумын төв нь  Завхан  голын  дэнж  Цагаан-Олом  хэмээх  газар Улаанбаатар хотоос 1000 км,  аймгийнхаа төвөөс 46 км  зайд оршдог.

Бүх нутгийн 65 % нь уулархаг, 20 % нь хээр тал, 12 % нь говь, 0,4%  нь ойт хээрийн бүсэд хамаардаг.    Нутгийн хамгийн өндөрлөг газар нь Хасагт хайрханы  нурууны “Зост-Өндөр”  уул далйн  төвшнөөс  дээш 3311  метрийн өндөрт өргөгдсөн.