НИТХ-ын ээлжит бус тавдугаар хуралдаан өнөөдөр 80 хувийн ирцтэйгээр хуралдав. Хуралдаанд Нийслэлийн Засаг дарга бөгөөд Улаанбаатар хотын захирагч Э. Бат-Үүл  2013-2016 оны үйл ажиллагааныхаа хөтөлбөрийн төслийг танилцууллаа.

 Нийслэлийн Засаг дарга бөгөөд Улаанбаатар хотын Захирагчийн  мөрийн хөтөлбөр нь НИТХ-ын ээлжит сонгуульд нийслэлийн Ардчилсан намын боловсруулж орсон мөрийн хөтөлбөр дээр суурилжээ. Үйл ажиллагааны хөтөлбөрийг Үндсэн хуульд заасанчлан иргэдийн эрүүл, аюулгүй орчинд амьдрах эрхийг хангах төрийн үүргийг сэргээн тогтоох үндсэн зорилготой гэдгийг Нийслэлийн Засаг дарга танилцууллаа. Юуны өмнө авлигын сүлжээг тасалж, нийслэлийн төр захиргааны байгууллагуудыг ил  тод, нээлттэй болгох, аливаа шийдвэрийг иргэдийн оролцоонд тулгуурлаж гаргадаг тогтолцоонд шилжүүлэхэд үйл ажиллагааны хөтөлбөрийн зорилтуудыг чиглүүлжээ. 

Хөтөлбөрт

• Гэр хорооллыг тохилог амины орон сууцны хороолол болгон хөгжүүлэх чиглэлээр  нийслэлийн дүүрэг бүрт иргэдийн санаачлага, оролцоотойгоор гэр хорооллыг инженерийн шугам сүлжээнд холбох хэсэгчилсэн төлөвлөлт хийж, загвар төсөл боловсруулан хэрэгжүүлнэ.
• Улаанбаатар хотын гэр хорооллыг дэд бүтэц бүхий амины орон сууцны хороолол болгон хөгжүүлэх хэсэгчилсэн ерөнхий төлөвлөгөөг дүүрэг, хороод тус бүрээр, бүсчилэн боловсруулж 6 жилийн дотор хэрэгжүүлнэ.
• Гэр хорооллын иргэдийн инженерийн нэгдсэн болон хэсэгчилсэн хангамжтай болох чиглэлээр хэрэгжүүлсэн санал санаачлага, үйл ажиллагааг дэмжин, хөрөнгө оруулалтын тодорхой хувийг нөхөн олгох хууль эрх зүйн орчинг бүрдүүлнэ. 
• Хотын зүүн хэсэг УС-15, баруун хэсэг Баянхошуу, хойд хэсэг Таван буудал орчимд орчин үеийн дэвшилтэт технологи бүхий дулааны станцыг үе шаттайгаар барина. Шархад, Амгалан, Орбит, Толгойт, Хайлааст, Долоон буудал болон бусад гэр хорооллын бохир усны гол шугамыг барина хэмээн тусгажээ.  

Мөн Орон сууцны хангамжийг нэмэгдүүлэх чиглэлээр Улаанбаатар хотыг 2030 он хүртэл хөгжүүлэх ерөнхий төлөвлөгөөний дагуу орон сууцны хорооллын хэсэгчилсэн ерөнхий төлөвлөгөөнүүдийг тодотгож нийтийн орон сууцны хөтөлбөрийг үргэлжлүүлэн  хэрэгжүүлэх аж. Хүн амын 58 хувийг төвлөрсөн болон хэсэгчилсэн дулаан хангамж бүхий орон сууцаар, 20 хувийг бие даасан эх үүсвэрээр, үлдэх хэсгийг стандартад нийцсэн халаалтын шинэ технологи бүхий тохилог орон сууцаар хангана гэв.  Засаг дарга бүрэн эрхийнхээ хугацаанд хэрэгжүүлэх үйл ажиллагааны хөтөлбөрийг төсөв, санхүүтэй уялдуулж оруулж ирсэн нь бодитоор хэрэгжих баталгаа гэдгийг онцолсон. 

Нийслэлийн Засаг дарга бөгөөд Улаанбаатар хотын Захирагчийн мөрийн хөтөлбөрийг дөрвөн жил хэрэгжүүлэхэд нийт 16.5 их наяд төгрөг шаардагдах төсөөлөл гаргасан байна. Энэхүү томоохон хөрөнгө оруулалтад улс, нийслэлийн төсвөөс гадна хандивлигч орнууд болон Олон улсын төсөл, хөтөлбөрүүдтэй хамтран ажиллах нээлттэй бодлого баримтална гэж Засаг дарга үзэж байгаа аж. Нийслэлийн  Засаг  даргын мөрийн хөтөлбөрийг  НИТХ-ын  Тэргүүлэгчид , намын бүлгүүд, байнгын хороодын хурлаар хэлэлцээд гаргасан дүнэлтийг танилцууллаа. Намын бүлэг, байнгын хороодын болон нэгдсэн хуралдаан  дээр төлөөлөгчдийн гаргасан саналын томъёоллоор санал хурааж баталсан байна. Нийслэлийн Засаг даргын мөрийн хөтөлбөр хуралдаанд оролцсон төлөөлөгчдийн 100 хувийн саналаар батлагдлаа.

 Нийслэлийн Засаг дарга Э.Бат-Үүл үйл ажиллагааны мөрийн хөтөлбөр батлагдсантай холбогдуулан төлөөлөгчдөд хандан “Нийслэлийг 2030 он хүртэл хөгжүүлэх ерөнхий төлөвлөгөөтэй уялдсан, өргөн далайцтай, амбицитай үйл ажиллагааны хөтөлбөр батлагдлаа гэж үзэж  байна. Амбицитай байхаасч өөр арга байхгүй. Үнэхээр томоохон төсөл, хөтөлбөрүүд багтлаа. Тиймээс ч урьд өмнө батлагдаж байгаагүй том, том мөнгө яригдаж байна. Засаг даргын хувьд НИТХ-ын төлөөлөгч та бүхнээс цаашдаа дэмжлэг хүсэх зайлшгүй шаардлага гарна гэж бодож байна. Томоохон зээл, олон улсын хөтөлбөрөөс хөрөнгийн хомсдолд орчихоод байгаа нийслэлд татан төвлөрүүлэх том ажил биднийг хүлээж байгаа. Энэ бүхэн дээр та бүхнээсээ дэмжлэг хүснэ. Санал санаачлага анхан шатны нэгжээс байх шинэ жишгээр үйл ажиллагааны хөтөлбөр батлагдлаа. Урьдын адил дээрээс өгсөн үүрэг даалгаврыг биелүүлсэн болоод сууж байдаг нөхцөлийг өөрчиллөө. Нийслэлийн энэ жишгээр дараа дараагийн аймгууд үйл ажиллагааны хөтөлбөрөө хэлэлцэж баталдаг болох байх” гэдгийг онцоллоо.

НИТХ-ын ээлжит бус хуралдааны дараагийн хэлэлцэж баталсан тогтоолын төсөл нь Үл хөдлөх хөрөнгийн татварыг шинэчлэн бүсчлэн тогтоох тухай байлаа.  Үл хөдлөх хөрөнгийн  татварын шинэчлэн бүсчлэн тогтоох тогтоолын төслийг НИТХ-ын ээлжит бус 5-р  хуралдаанд нийслэлийн Засаг даргын Санхүү, эдийн засгийн асуудал  хариуцсан орлогч Н.Батаа танилцууллаа. Төсөлд нийслэлийн  татвар 3,4 тэрбум төгрөг буюу 28 хувиар өсөх тооцоо гарчээ.  Үл хөдлөх хөрөнгийн татварыг нийслэлийн газрыг бүсчилсэн арга дээр түшиглэн  тогтоожээ. Тогтоолын төслийг хэлэлцээд НИТХ-ын төлөөлөгчид баталлаа. НИТХ-ын энэхүү тогтоол батлагдсанаар  2013 оны нэгдүгээр сарын 1-нээс эхлэн Үл хөдлөх хөрөнгийн татвар төлөх юм байна. Тухайлбал нийслэлийн нэгдүгээр бүсэд үл хөдлөх хөрөнгөтэй иргэн, албан байгууллага, аж ахуйн  нэгж нэг хувийн татвар төлнө.  Харин 2,3-р бүсэд 0,8  хувь, 4,5-р бүсэд 0,6 хувийн татвар төлөхөөр баталлаа.